'n Kaas komplot! - deur Johan Obbes

Ek dink ek begin nou verstaan hoekom ek so ‘n sout verslawing in my se gebeente het. As dit nie ’n bredie is wat ’n “masalatjie” moet kry nie, sal dit maar altyd ’n stuk biltong of pak chips wees waaragter jy my oë sal sien blink terwyl ek vreet asof die beskawing se voortbestaan van my sukses afhang. So iets sê vir my dat julle, julle dan nie hoef te kommer oor uitsterf nie...don’t fear when Johan is near.

Dalk is dit ’n komplot of ’n vloek wat my Hollandse voorvaders meegebring het met hulle gestelery. (Onthou julle die see rower ene) Die donner! So aangesien ek kaas in my are het, ’n kaaskop van geboorte is en my vriendin ’n rou Hollander is...was dit mos nou die beste besluit om ‘n “kasery” aan die gang te sit wat enige homp Cheddar soos Paris Hilton by die Douglas landbou skou sou laat voel...UIT sê ek vir jou UIT. Maar so gemaak, begin ons die beplanning rondom kaas, en kyk, ’n beter komplot sou jy nie kry nie, nie eers Zuma, Malema, kamp staaldraad, kaas draad of selfs Joost met sy gaatjies onderbroek kon ons oortref nie. (No pun intended met die onderbroek en kaas kombinasie nie...) Want dit was kaas net waar jy kyk in daai klein kombuisie van my.

Maar wag laat ek eers vir niggie Sytske voorstel. Dis einste Hollandse vriendin van my, wat vir my die groot piesang as geskenk gegee het. (Gaan kyk bietjie die blog posts vir Julie) So met kaas op die brein kies ek toe ’n brunch spyskaart met hope kaas geregte want wie beters om my kaas verslawing met my te vier as my Kaaskop vriendin. (Emsie wat is die Afrikaans tog vir brunch?) Ek email toe die bestanddeel benodighede uit in die hoop dat meisie so paar goedjies bring en jou wragtag hier kom meisie aan met 18 eiers...ja dieselfde kind gee eers vir my ’n piesang en nou kom sy met 18 eiers hier aan. Mis ek dalk iets?

Poppie en ek is al jare lank pelle en praat ’n gooi ’n goeie “Afrikaas” tussen ons wat wissel van “Ag, nee jonge dis ‘n egt verdommenis hierdie...” tot woorde wat ek nie hier kan noem nie, want sien my ma is ’n kerk mens en ek wil haar nie traumatize met Hollandse woorde ...wat sy natuurlik in Afrikaans sal en staan en interpreteer nie. Ai die oumense van vandag.

Meisie het mos twee katte en haar dramatiese staaltjies “in Hollands” oor die twee gediertetjies het my ore laat tuit erger as ’n vuvuzela, in die begin jare. My eerste gedagtes by die aanhoor van die kind se taal, was eers dat die bergies voor in die straat se “papsak taal” (altyd mos oor iemand se ma natuurlik...vistaan djy!) werklik hierdie vriendin van my so getraumatiseer het, dat sy dalk dink ons hier in die Kaap praat van katte en ma’s op dieselfde manier...maar dit was bloot Nederlands en nie “papsak Afrikaaps” nie. So ek ken meisie se hart en dis soveel beter as selfs enige Mature Cheddar. Liefde en goedheid van begin tot einde.

Maar so besluit meisie en ek omtrent om vir die hele Kaap te kook en so kies ons toe die Kaaspoffertjies pg. 54 in Knuppeldik aan Koningskos EN die Pizza omelet pg. 55. (Hoeveel kan twee mense ook nou eet!)

Natuurlik praat ons toe so baie dat ons effe meer kaas in die spulletjie gegooi het as wat die resep gesê het. Maar mens kan mos nooit te veel kaas in ’n resep smyt nie, of selfs veel rooiwyn of chocolate nie. Ek sê steeds...leef, eet en voel oor niks skuldig nie! Ooooooo hou my terug!

Die poffertjies was veronderstel om in ’n kolwyntjie pan te kom, maar daar besef ek toe dat my pan te groot is om in die oond te pas... uhu!

Dus maak ons toe maar die spulletjie in ’n koek pan en besluit om die “kaasbrooderigheid” sommer te hou vir die aand se snoek braai. Ja, ja ek weet my beplanning was deurmekaar maar ten minste het ek die bakpoeier onthou...wel dis wat my ma altyd vra. “Ag, herre Johan sê tog net jy het die bakpoeier onthou!” – Ja, ma ek het die bakpoeier onthou.

Wel, om eerlik te wees was beide resepte absoluut dekadent en die kombinasie van die Kaasbrood (was mos eers poffertjies) saam met ’n vars Snoek op die kole, Knoffel botter en Appelkoos jam...op was perfek...hmmm soos nektar op die tong! Probeer dit gerus. Die Pizza-omelet was net so heerlik en ons het in plaas van gekapte ham, sommer diced bacon gevat, (wat is dit met my en diced bacon!) wat die omelet sowaar ’n arrogansie gegee het om ’n enige bacon & eiers ontbyt se gat te skop. HEERLIK gewees...ek en meisie het soos twee katte op die bank neer geplof na die groot vreet en gesels tot die oë amper toe val. Tannie Joey en Tannie Hester...julle resepte was wenners en julle sterretjies skyn nog helder.

En dalk kan ek afsluit met een van die baie wyse sê goed wat onder aan die Pizza omelet was...”Gebruik die tyd waarin jy jou oor die toekoms kwel...om nou te leef.”

Kaaspoffertjies


BESTANDELE:

1 k gerasperde kaas (cheddar)

½ t sout

1 e gesmelte margarien

¼ t peper

1 k koekmeel

1 eier geklits in 200 mℓ melk

4 t bakpoeier

½ t droë mosterd

METODE:

Verhit oond 230C (450F). Sif droë bestanddele saam. Meng ander bestanddele en gooi by droë bestanddele. Meng tot sagte deeg. Skep in vlak kolwyntjiepan, ⅔ vol met deeg. Bak vir 12 – 15 min. Bedien warm of koud met kaas, konfyt of heuning.

Pizza-omelet

BESTANDELE:

6 eiers

125 mℓ water ( ½ k )

Sout & peper

50 mℓ botter (4e)

5 mℓ gemengde kruie (1 t)

10 mℓ tamatie puree (2 t )

250 mℓ gekapte ham (1 k) – ons het sommer diced bacon gebruik

2 tamaties geskil en in skywe gesny

6 skywe Cheddar kaas (gerasper werk net so goed)

METODE:

Klits die eiers, voeg water by en geur na smaak. Smelt die botter in die ‘n groot pan. Voeg daarna eiers by sodra die botter sis. Trek die gestolde eier weg van die kante van die pan sodat die rou eier kan inloop. Sprinkel die kruie bo-oor sodra die onderkant gestol is, maar die bokant nog klam is. Meng tamatiepuree en ham. Smeer oor die omelet. Rangskik tamatie- en kaasskywe oor die ham en laat smelt onder die element van die oond.